UPDATE | Estudyante sa nag-viral nga video sa diin naning-al ang maestro bangud sa mahina nga signal sa internet, nagsaysay sang natabu; maestro, nagpabutyag naman nga sarcastic manabat ang estudyante

By: Aine Grace Bravo

ILOILO, September 24, 2020 – “Gusto ya mabatian nga present. Dapat mahambal ka gid present. Gahambal man ko present, pero may problema gid sa signal. May ara man problema sa signal sa iban nga klase pero kaintiende man iban namon nga maestro.”

Ini ang ginpahayag ni alyas Toto, ang estudyante nga naakigan sang maestro sa nag-viral nga video sang online class nga gin-post sa Facebook.

Suno kay Toto, second year sa kurso nga Marine sa Western Institute of Technology, kuha ang video kahapon, Setyembre 23, sa ila klase sa Auxiliary Machinery. Ginahiwat ini kada Lunes, Miyerkules kag Biernes halin la una tubtob las kuwatro sa hapon.

30 sila ka estudyante sa amo nga klase.

Ginkilala niya ang ila maestro kay Engr. Inocencio Dadivas.

Suno kay Toto, naga-check attendance ang maestro pagkatapos sang ila leksyon.

Masami suno sa iya nga ginalawag sang maestro sang tatlo ka beses ang ngalan sang estudyante kag kun indi makasabat, ginamarkahan nga absent bisan ara sa virtual classroom.

Kahapon suno sa iya, indi estable ang signal sang iya wifi kabangdanan wala nabatian sang maestro ang paghambal niya nga “present” sang ginlawag ang iya ngalan.

Nagtodo suno sa iya ang iya tingog sang naghambal siya liwat nga “present” agud mabatian gid kabangdanan naakig ang maestro kag ginhambalan siya nga magsaka sa lubi para magka-signal kag ginpamangkot kun nga-a nag-enroll pa siya nga wala man siya signal.

Suno kay Toto, siya gid ang ginatumod sang nagpangakig ang maestro.

Ang iban suno sa iya nga professor nila sa online class, naka-intiende man kun mahina ukon indi estable ang ila signal.

Sa interview man sa Aksyon Radyo sa iloy ni Toto nga si Sipang, ginklaro niya nga indi iya bata ang nag-upload sang video sa social media.

Nagpagguwa na sang statement ang eskwelahan angut sini.

“SARCASTIC ANG TONO”

Sa exclusive interview sang Aksyon Radyo, nagpa-athag sang iya bahin si Engr. Dadivas.

Suno sa maestro, nagaklase sila sang Auxiliary Machinery I kag naga-roll call siya sang nakit-an ang ngalan sang estudyante nga absent na “for 5 sessions sang September 8, 10, 16, 18, 23.”

Bilang instructor, ginpamangkot ni Engr. Dadivas ang mga classmates ni Alyas Toto bangud concern siya nga lima ka adlaw na nga absent.

Gulpi suno sa iya naghambal si Alyas Toto nga “present ko sir,” gani ginhambalan siya ni Dadivas nga,“present ka? For 5 days pag-roll call ko waay ka gid d oh.”

Nagsabat suno kay Dadivas si Toto nga “bal-an mo sir gadula-dula signal namun diri oh.’

Ginpabutyag ni Dádivas nga gin-explain niya nga yara sila sa online nga mode of teaching kag nagkabalaka siya kun paano makatuon sa topic kun wala sang linya.

Dugang ni Dadivas, nahangpan niya kag gina-consider kun mahina ang signal. Pero sa kaso ni Toto, lima gid siya ka adlaw nga absent kag mabudlay maka-catch up sang mga leksyun.

Bangud sa ‘sarcastic’ nga tono sang paghambal sang estudyante kag sulit-sulit nga pag-insist, nakahambal si Dadivas nga, “Bal-an mo gali wala ka signal, sagi ka pa enroll.”

Inspirasyon lang para sa estudyante nga mangita sang signal ang hambal niya nga “saka sa lubi,” kag indi nga pakalainon siya. Pero wala naglaum si Dadivas nga nag-record ang estudyante. Suno sa maestro, bag-o lang siya nakasalapo sang amo nga sitwasyon.

Ginpanindugan ni Dadivas nga intensyon niya nga mag-inspire sang mga estudyante sa ila nga pagtuon.

“My concern is for the students, that they can pass the subject. They know something about the topic. That is the concern of the instructor/professor. I’ve been teaching in WIT for 18 years. All my students are professionals. They are already chief engineer, 2nd engineer…,” suno kay Engr. Dadivas. | via Farrah Mae Morano/Hotline