ArchivesKalusuganLokal

5 barangays sa Iloilo City, ipa-idalum man sa total lockdown; lockdown sa Bolilao, Mandurriao, palawigon sang 3 adlaw

By: Aine Grace Bravo

ILOILO CITY, September 25, 2020 – Lima pa ka barangay sa siyudad sang Iloilo ang ipa-idalum sa total lockdown bangud sang bag-o nga COVID-19 cases.

Base sa Executive Order nga ginpaguwa ni Mayor Jerry Treñas subong nga adlaw, Setyembre 25, i-imponer ang total lockdown sa Brgy. MV Hechanova, Brgy. Lopez Jaena, Brgy. Sambag kag Brgy. Lanit sa Jaro kag Brgy. Caingin sa La Paz.

Gin-extend naman sang tatlo ka adlaw ang lockdown sa Brgy. Bolilao, Mandurriao.

Maga-epekto ang 72 oras nga localized containment sa gintumod nga mga barangay las-seis karon sa gab-i kag magalawig tubtob las-5:59 sang hapon sa Setyembre 28, 2020.

Una na ginpa-idalum sa lima ka adlaw nga total lockdown ang Simon Ledesma, San Isido kag M.H. del Pilar sa Jaro; Bolilao, Mandurriao; Calumpang, Molo; Concepcion, City Proper; Sooc, Arevalo; Aguinaldo, La Paz kag Mansaya, Bo. Obrero, Punong, kag Lapuz Sur sa Lapuz sang Setyembre 22.

Samtang sang Setyembre 23, gindugang sa listahan ang Brgy. Jalandoni Estate, Lapuz. | via Jeremae Ventar/Iloilo City Government