Driver sang motorsiklo, patay sang nalapakan sang truck sa Zarraga

By: JoMaque | Setyembre 28, 2020

ILOILO – Patay ang driver sang motorsiklo sang nalapakan sang 10-wheeler truck sa Barangay Jalaud Norte, Zarraga (Bangga Bante), las-4:20 sang hapon sang Setyembre 27.

Ginkilala ni Police Lieutenant Johnny Arnad, hepe sang Zarraga Police Station ang biktima kay Hecekiah Sombong, 20 anyos sang Brgy. Q. Abeto, Mandurriao. Samtang si James Edang, 27 anyos sang Brgy. Cano-an Estancia naman ang driver sang truck.

Suno kay Arnad, pareho nga padulong sa Northern Iloilo halin sa Zarraga ang direksyon sang motorsiklo kag truck. Yara sa kilid sang karsada ang motorsiklo samtang malapit naman sa center lane sang dalan ang truck. Halos dungan suno sa iya nga nagliko ang truck kag motorsiklo pero naigu ang left side mirror sang motorsiklo rason nga natumba.

Nalapakan sa ulo sang pang-ulihi nga goma sang truck si Sombong nga may suksok man nga helmet.

Gindala pa sa ospital ang biktima nga may patal nga pilas sa ulo pero gindeklarar nga dead-on-arrival.

Samtang yara naman sa kustodiya sang Zarraga Police si Edang kag ginakuhaan pa sang Aksyon Radyo Iloilo sang pahayag.