Bangkay sang trisikad driver sa Sara nga gin-release sang WVMC, ginhingagaw palubong matapos nagguwa ang RT PCR test result nga positibo siya sa COVID-19

By: JoMaque | Oktubre 1, 2020

Iloilo — Ginkatingala ni Sara Mayor Jon Aying ang pag-release sang Western Visayas Medical Center sa bangkay sang 40-anyos nga trisikad driver nga napatay sang nabungguan sang awto.

Ini bisan gin-swab ang pasyente sang kritikal nga nag-abot sa ospital sang Setyembre 28 sang kaagahon, pero napatay makaligad ang pila ka oras.

Suno kay Aying, gin-release sang ospital ang bangkay kag ginkuha sang taga-Somo Funeral Homes ang bangkay. Pero nagguwa kagab-i, Setyembre 29, ang resulta sang RT-PCR test nga positibo sa COVID-19 ang napatay.

Kaina sang aga, ginpahingagaw ni Mayor Aying palubong ang bangkay matapos nabaton ang resulta.

Naka-quarantine ang mga empleyado sang Somo Funeral Homes Sara kag pamilya sang trisikad driver.

Nagpromisa naman ang WVMC management nga masabat sila buwas, Oktubre 1, kun makuha na ang tanan nga data sa natabu.

Wala sang anuman nga balatian ang trisikad driver antes siya nabungguan kag napatay, suno kay Punong Barangay Erma del Castillo sang Brgy. Devera, Sara. | via Aksyon Dave Bucayan