Pamilya sang 23-anyos nga babaye, nagreklamo nga wala gin-atipan sang doktor ang ila himata sang nagbun-ag sa isolation facility sa Iloilo City

By: JoMaque | Oktubre 1, 2020

Nagreklamo ang pamilya sang 23-anyos nga babaye sang nagbun-ag sa isolation facility nga wala gin-atipan sang doktor.

Suno kay Ms. Jo Ellaine Alayon, bayaw sang 23-anyos, nagareklamo ang iya sister-in-law nga nagasakit na ang iya tiyan kag daw mabun-ag na las 9:00 sang gab-i sang Setyembre 29.

Dugang ni Alayon, nag-text ang iya bayaw sa doktor nga mabun-ag na siya kahapon sang hapon, Setyembre 30, apang ginhambalan siya sang doctor nga punggan anay.

Ginhambalan man siya sang doctor nga mag-inhale kag exhale lang anay suno kay Alayon.

Ginpahayag ni Alayon nga indi maka-assist ang doktor bangud positibo sa COVID-19 ang iya bayaw.

Gilayon nga gin-transfer sa Western Visayas Medical Center ang 23 -anyos nga iloy kag ang iya lapsag.

Wala pa na-utod ang umbilical cord sang lapsag sang ginsaylo sila sa WVMC suno kay Alayon .

Wala pa sang may nakapa-athag sa pamilya kun ngaa wala sang may nag-atipan sa 23-anyos nga iloy.

Yara na sa maayo nga kahimtangan ang iloy kag ang iya lapsag nga lalaki.

Ginatinguhaan sang Aksyon Radyo Iloilo nga makuhaan sang statement ang management sang nasambit nga isolation facility. | via Aksyon Brian Valle