Driver sang 10-wheeler truck, patay sa aksidente sa Passi City

By: Aine Grace Bravo

PASSI CITY, Ilo., October 2, 2020 — Patay ang 36-anyos nga driver sang 10-wheeler truck nga nakabunggo sa poste sang kuryente kag haligi sang gym sa Barangay Imbang Grande, Passi City.

Ginkilala ang driver kay Marshial De Juan, tumandok sang Brgy. Sta. Monica, Lubao, Pampanga.

Suno kay PSSg Gervin Palec sang Passi City Police Station, las-6:50 kagab-i, Oktubre 1, sang natabu ang aksidente.

May patal nga pilas sa ulo ang driver, suno kay Palec.

Nakapakig-angut naman ang Passi City police sa pamilya ni De Juan sa Pampanga agud mapahibalo sila sa natabu. | via El John Mejia