Mga negosyante sa Boracay, naghingyo sa gobyerno nga pahapuson ang pagsulod sang mga turista sa isla

By: Aine Grace Bravo, Aksyon Radyo Iloilo

BORACAY, October 6, 2020 – Naga-apelar ang business sector nga pahapuson sang gobyerno ang pagsulod sang mga turista sa Boracay Island.

Kasunod ini sang pagbisita ni Presidential Spokesperson Harry Roque sa sikat nga isla.

Sa iya press conference kahapon, Oktubre 5, isa sa mga namitlangan nga rason sang daku nga negosyante kun ngaa wala nadayon ang pagbakasyon sang mga turista ang pag-require sang negatibo nga RT-PCR test antes makasulod sa Boracay.

Sa Executive Order No. 037 series of 2020 ni Governor Florencio Miraflores, gina-require ang mga indi taga-Aklan sang negative RT-PCR test result kag dapat gin-conduct ang test 48 oras antes ang pagbiyahe. Dapat man nga may confirmation booking kag mag-fill-out sa health declaration.

PAHAPUSON ANG PROSESO

Ginpabutyag sang negosyante nga kun mahapos ang proseso, mas madamo nga turista ang makadto sa Boracay. Kun may negosyo, suno sa iya, may income man ang mga empleyado nga nadulaan sang trabaho bangud sa pandemya.

Ginabanta sa 30,000 ang mga empleyado sa Boracay, pero ginpili sang pila ka negosyante nga indi magbukas bisan may permit na bangud dyutay lang ang mga turista nga nagbakasyon halin sang ginbuksan liwat ang isla sa mga turista sang Oktubre 1.

BULIG SA TURISMO

Ginpabutyag ni Secretary Roque nga libre ang RT-PCR test sa mga trabahador sa idalum sang tourism industry bangud nga bayaran ini sang PhilHealth.

Dugang sang tiglikum, mahatagan sang bulig ang industriya, ilabe na ang mga magagmay nga negosyo nga nagsirado bangud sa pandemya, base sa naplastar sa Bayanihan to Recover as One Act (Bayanihan 2).

DISCOUNT

Ginakumbinser ni Governor Miraflores ang mga turista nga magbakasyon sa Boracay bangud maka-avail sila sang tubtob 75% nga discount sa room rate sang mga hotels.

Suno sa gobernador, nahisugtan ini sang mga tour operators kag establishments agud ma-offset ang bayaran sang mga turista sa RT-PCR test.

Ginapanindugan naman ni Gov. Miraflores ang sistema agud masiguro nga indi makasulod sa Boracay ang COVID-19. | via Yes the Best Boracay; Photo courtesy: Amazing Boracay/Benjie de la Cruz