Iloilo City Mayor Jerry Treñas, mapagguwa sang EO sa pag-ban sang videoke, iban pa nga unnecessary noise sa tiun sang class hours

By: Aine Grace Bravo, Aksyon Radyo Iloilo

ILOILO CITY, October 8, 2020 – Natalana nga magpaguwa sang Executive Order si Mayor Jerry Treñas nga magadumili sang videoke kag iban pa nga magahud nga aktibidad sa tiun sang class hours.

Ini bilang pagsunod sa hingyo ni DILG Secretary Eduardo Año sa mga LGUs nga i-ban ang mga gahud nga makadisturbo sa pagtuon sang mga estudyante nga naga-adjust pa sa blended learning.

Suno kay Mayor Treñas, posible mapaguwa niya ang EO antes las-12 buwas sa udto, Oktubre 9.

Ginpahibalo man siya ni Councilor Love-Love Baronda nga ginapreparar na sang Konseho ang ordinansa may kaangtanan sa amo nga tikang.

Samtang wala pa ang ordinansa, pwede suno sa alkalde nga magamit sang mga pulis ang iya EO agud nga magpanaway kun may magreklamo nga estudyante. | via Firingline