Lalaki nga gintudlo naglugos sa 13-anyos nga dalagita sa Lemery, napatay sa ospital matapos natiruhan sang amay sang dalagita

By: Aine Grace Bravo/May Ortega

LEMERY, Ilo., October 8, 2020 — Napatay sa ospital ang 18-anyos nga lalaki nga natiruhan sang amay sang 13-anyos nga dalagita nga ginpahayag iya ginhimuslan.

Natabu ang insidente sang Oktubre 4, sa nabukid nga parte sang Lemery.

Suno kay alyas Ruby, iloy sang dalagita, tumandok man sang ila lugar ang suspek nga si Joem pero nagsaylo na sa Barotac Viejo.

Nagbalik lang si Joem sa lugar bangud nag-upod sa iya bestfriend nga nagpamalaye.

Nagtenir si Joem sa balay sang ugangan ni Ruby nga si Kanoy. Pakaslan sang bestfriend ni Joem ang manghod ni Junjun nga bana ni Ruby.

Sang Oktubre 4 suno kay Ruby, ginsugo sang tiyo ang dalagita nga si alyas Gingging nga magbakal sang sigarilyo.

Sang nadugayan nga magbalik, gin-apas sang manghod nga naga-edad 12-anyos si Gingging sa tiyangge pero ginsugiran siya nga wala ini nakabakal sang sigarilyo.

Ginpangita sang manghod si Gingging tubtob nasiplatan niya nga ginahimuslan ni Joem sa banglid ang iya magulang.

Nagdalagan ang manghod kag nanugid sa ila lolo nga si Kanoy. Ginpadulungan man ni Kanoy ang lugar pero wala na ang suspek kag nakita nga nagadalagan na sa kahon pauli sa ila balay.

Ginsugiran man sang manghod ang ila amay nga si Junjun nga nagdali-dali man kadto sa balay sang iya amay.

Ginkomprontar ni Junjun si Joem pero siya pa ang nanghangkat sa amay ni Gingging nga sumbagon siya, tiruhon siya kag patyon siya, “Sumbaga ko sir, tiruha ko sir, patya ko sir,” ang ginsulit-sulit nga hambal ni Joem kay Junjun suno kay Kanoy.

Ini ang rason suno kay Kanoy kun ngaa gintiro ni Junjun si Joem.

May pilas sa tuo nga parte sang ulo si Joem kag gindala pa sa ospital pero napatay sang Oktubre 6.

Ginlaragway naman sang utod nga si Jovelyn ang iya utod nga si Joem nga mabuot kag mapinalanggaun.

Ginpahayag ni Jovelyn nga himuon nila ang kutob sa ila masarangan agud maangkon ang hustisya.

Ginpreso si Junjun pero gin-release naman suno kay Ruby.

Ginhinambit ni Ruby nga ‘may diperensiya’ ang iya anak kabangdanan nga Grade 4 pa lang bisan 13 anyos na.

Base sa medical certificate halin sa Rural Health Physician sang banwa suno kay Police Lt. Francis Batallones, deputy chief sang Lemery PNP, nagapakita nga may laceration sa kinatawo sang dalagita. | via Aksyon Hotline