Police official, gin-report nga nagpalupok sang pusil sa kampo sang 2nd IPMFC sa Sara, Iloilo

SARA, Ilo., October 9, 2020 — Gina-imbestigaran sang Sara police ang deputy sang Regional Special Training Unit 6 nga gin-report nagpalupok sang pusil sa kampo sang 2nd Iloilo Provincial Mobile Force Company headquarters sa Brgy. Zerrudo, Sara, 3:45 P.M. kahapon, Oktubre 8.

Suno kay Major Jose Nemias Pamplona, hepe sang Sara Police Station, may nagtawag sa ila las-9:00 kaina sang aga kag nagpahibalo nga may shooting incident sa sulod sang Camp Jalandoni.

Sang nagresponde sa lugar, nadiskubrehan nga ang gin-report nagpalupok sang pusil amo si Major Terence Paul Sta. Ana, deputy sang Regional Learning and Doctrine Development Division (RLDDD).

Sa inisyal nga imbestigasyon sang mga pulis, nagpalupok sang duha ka beses si Sta. Ana kag ginpatawag ang mga pulis nga naga-training para mag-form.

Ginapatihan naka-inom pa si Sta. Ana sang nagluntad ang insidente.

Wala sang may na-recover sa lugar kag wala man sang may napilasan.

Suno naman kay Lt. Col. Roy Subsuban, Officer-In-Charge sang RSTU6, lakip sa trabaho ni Sta. Ana ang pag-monitor sang mga pulis sa ila training.

Nagdepensa naman si Sta. Ana nga luyag niya nga mahibaluan kun paano magresponde ang mga pulis nga naga-training kun may magpang-harass rason nagpalupok sang pusil.

Ginadumilian ang pagpalupok sang pusil sa atubang sang iban pa sa training base sa manual, suno kay Subsuban.

Gin-restrict sa Kampo Delgado si Sta. Ana samtang nagapadayon ang imbestigasyon.

Ginatinguhaan sang Aksyon Radyo Iloilo nga makuhaan sang pahayag si Sta. Ana angut sa insidente. | via Aljohn Torreta