1 patay, 1 pilason sang ginpangwasay kag ginpangbuno sa Estancia

By: Aine Grace Bravo, Aksyon Radyo Iloilo

ESTANCIA, Ilo., October 28, 2020 — Isa patay kag isa ang pilason sang ginpangwasay kag ginpangbuno sang isa ka pamilya sa sulod sang ila balay sa Barangay Poblacion, Estancia, Iloilo kagab-i, Oktubre 27.

Ginkilala ang napatay kay Jeffrey Corvera, 46 anyos nga may pilas sa ulo, tangkugo, likod kag dughan. Ginhigagaw pa siya dala sa ospital apang gindeklarar nga dead on arrival.

Ginabulong naman sa ospital ang upod niya sa balay nga si Ryan Villaluna, 31 anyos nga may pilas sa ulo, likod, kag dughan.

Lunsay mga job hire sa munisipyo ang mga biktima.

Arestado naman ang mga suspetsado nga sanday Nelson Torrico, ang 64-anyos nga amay, Jocelyn Torrico, ang 60-anyos nga iloy, kag ila kabataan nga sanday Nel John, 30-anyos; Nelson Jr., 29-anyos; kag Niel, 25-anyos.

Gin-ako sang mag-amay nga sila ang naghimo sang krimen.

Suno kay PMaj. Aldren Lamera, hepe sang Estancia Police Station, ginbantayan sang mga suspetsado ang mga biktima sang nagpauli. Nagsulod ang duha sa balay pero ginsundan pa gid sila sang mga suspetsado kag didto ginpatay si Corvera.

Nakapalagyo si Villaluna pero nagbalik agud kuntani lantawon ang sitwasyon ni Corvera pero ginlab-ut pa gid siya sang mga suspetado.

Yara man sa sulod sang balay suno kay Lamera ang utod kag bayaw ni Corvera pero nakapanirado sang puwertahan kabangdanan wala na nalab-ut. Makita sa sira sang puwerta nga may agi pa sang wasay,

“Kun na-abrihan ang puwertahan, masaker guro,” dugang pa ni Lamera.

Sa imbestigasyon suno kay Lamera, si Nelson Sr. ang nagpangamot sa pagwasay samtang si Nelson Jr. naman ang nagpangbuno. Ang duha pa ka utod ang nagakapot sa mga biktima.

Isa sa mga ginalantaw nga anggulo sang mga pulis, amo nga may kaakig ang mag-amay sa mga biktima bangud sila ang ginapasibangdan kun may nagakadula nga gamit sa balay sang duha.

Sa dugang nga pag-usisa suno kay Lamera, natukiban nga may record sang pagpangawat sa barangay ang pamilya sang mga suspek. Padalman man sang police ang impormasyon nga involved ang mga suspek sa negosyo sang illegal nga druga.

Nadakpan ang mga suspetsado sa balay sang ila mga paryente. Wala na suno kay Lamera nakapalagyo ang mga suspetsado bangud nakordon gilayon ang zona sa barangay sa diin sila naga-istar.

Kasuhan ang magpamilya sang murder kag frustrated murder.

‘NA-IMPITO’

Gin-ako ni Nelson Sr. sa interview ni Aksyon Radyo correspondent Jerry Medina nga siya ang nangamot sa pagpangwasay kag pagpangbuno sa mga biktima bangud sa ka-impito sa masami nga pagpasibangud sa ila.

Gin-deny niya nga nagbulig ang iya asawa kag kabataan.

Ginpanindugan man sang kabataan nga gintuyo pa nila nga punggan ang ila amay sa paghimo sang krimen. | via Aksyon Hotline/Aksyon Radyo Correspondent Jerry Medina