Virtual Dinagyang 2021, pre-recorded, indi na competition – City Tourism Office
By: Aine Grace Bravo, Aksyon Radyo Iloilo
ILOILO CITY, November 13, 2020 — Pre-recorded ang mangin performance sang mga tribu nga mapasakup sa virtual Dinagyang Festival sa Enero sa masunod nga tuig.
Suno kay City Tourism Officer Junel Ann Divinagracia, sa pinaka-ulihi nga meeting ni Mayor Jerry Treñas upod sa Iloilo Festivals Foundations, Incorporated, na-istoryahan nga indi pag-i-live ang presentation bangud may posibilidad nga dugukan ini sang mga tawo.
Gin-athag ni Divinagracia nga magahimo gid sang bag-o nga presentation ang mga tribu nga amo ang iga-record nila kag ipaguwa sa ano man nga medium nga mapilian sang syudad.
Luyag man ni Mayor Treñas kag sang IFFI nga wala na sang competition bangud mabudlayan ang mga tribu sa pagtipon sang warriors agud mag-practice.
Nahisugtan ang virtual Dinagyang 2021 bangud man sang pamahug dala sang COVID-19. | via BBB