Anay Capiz Director Samuel Nacion nga tumandok sang Miag-ao, Iloilo, gin-promote nga Brigadier General
KAMPO CRAME – Bugal sang Miag-ao, Iloilo ang bag-o promote nga si Police Brigadier General Samuel Nacion.
Si Nacion ang nag-gradwar sa PNP Academy sang 1992 kag gilayon nga gin-assign sa Regional Mobile Force sa Police Regional Office 6.
Naka-agi man siya assign nga hepe sang Sibalom Police Station sa Antique, head sang Mobile Group sa Culasi, Antique, chief sang Anti-Illegal Drug Task Force sang 2002 tubtob 2003 kag Provincial Director sa Aklan, Capiz kag Negros Occidental.
Nangin Senior Executive Assistant man siya ni retired PNP Chief Camilo Cascolan.Ginlaygayan ni Nacion ang mga bataun nga pulis nga suguran ang maayo nga legacy sang temprano.
Nagapasalamat naman si Nacion sa iya pamilya kag mga kaupod sa PNP sa iya nalab-ut.“Ang ginasiling ko sa subong sa mga junior naton, if we want to leave the best legacy, we should start from the junior days. If we start it right, we will end it right,” suno kay Nacion.
“Obra kita sang ensakto, may integridad, may kredibilidad, agud ang pagserbisyo naton may dignidad,” dugang ni Nacion.
WALA AKO NAGA-LOBBY SANG ASSIGNMENT
Nagahulat si Nacion sang iya masunod nga assignment.
Ini ang iya sabat sang ginpamangkot kun posible ma-assign siya nga director sang PRO 6.
Kaupod ni Nacion nga na-promote ang iya classmate sa PNPA nga si PBGEN Jack Wanky nga nakapangasawa sang Ilongga kag na-assign man sang una sa PRO 6.
