2 suppliers sang MORE Power halin sa Manila nga nagsulod sa Iloilo City, nadakpan nga naggamit sang ‘tampered’ nga letter of acceptance
ILOILO CITY – Gindakup ang duha ka suppliers sang More Electric and Power Corporation bangud naggamit sang tampered nga letter of acceptance sang nagsulod sa Iloilo City halin sa Manila kaina sang hapon, Disyembre 6.
Suno kay Iloilo City COVID-19 team spokesperson Jeck Conlu, natabu ang pag-aresto sa General Luna Street, city proper samtang nagakaon sa restaurant ang duha.
Nag-agi sa Caticlan sanday Jackson Pua kag Rene Rose Seno sakay sa van halin sa Manila padulong sa siyudad sang Iloilo.
Gin-check ang ila dokumento sa Caticlan sang counterpart sang siyudad sa Aklan kag gin-forward sa Iloilo City COVID-19 Emergency Operations Center.
Nakita sang Operation Center nga wala sila naka-issue sang letter of acceptance sa duha.
Natukiban man suno kay Conlu nga ang control number sa ila acceptance sang Setyembre pa gin-issue sang Operation Center rason nga nagduda sila. Preso na ang duha sa Iloilo City Police Station 1.
Tun-an pa sang siyudad kun mapasaka sila sang kaso bangud nagapadayon pa ang pag-imbestigar sa ila mga dokumento.
‘WARNING NA INI”
Warning na ini suno kay Conlu sa mga luyag nga magsulod sa Iloilo City. Nagapatimaan lang ini nga indi basta-basta makasulod sa siyudad kag hugot ang pagbantay sang Task Force COVID-19 sa tanan nga nagasulod agud masiguro nga may nagakaigu nga koordinasyon.
