Iloilo province, nagapanguna sa may pinakamadamo nga new cases sang COVID-19 sa Western Visayas

ILOILO CITY – Probinsiya sang Iloilo naman ang nagpanguna sa may pinakamadamo nga new cases sang COVID-19 sa Western Visayas subong nga adlaw, Disyembre 29.

Base sa case bulletin No. 277 sang Department of Health 6, 50 ka bag-o nga kaso ang nadugang sa rehiyon sa diin, 21 halin sa Iloilo province; 12 sa Negros Occidental; tag-pito sa Aklan kag Iloilo City; duha sa Bacolod City; kag isa sa Capiz.

Wala naman sang bag-o nga kaso sa Antique kag Guimaras. Bangud sini, nagsaka sa 21,498 ang kabug-usan nga kaso sa rehiyon kag 790 pa ang active cases.

Gin-report man sang DOH 6 ang 190 ka new recoveries kag anum ka bag-o nga nagkalamatay rason nga naglab-ut na sa 20,136 ang total recoveries samtang 652 ang total deaths bangud sa COVID-19.