NPA, nag-ako nga sila ang nagpalupok sang IED sa mga pulis sa Tubungan sang Disyembre 17
Iloilo (UPDATE) — Gin-ako sang New People’s Army nga sila ang nagpalupok sang Improvised Explosive Device (IED) sa mga pulis sa Barangay Balicua, Tubungan sang Disyembre 17.
Sa gin-issue nga pahayag sang Napoleon Tumagtang Command sang NPA para sa ika-52 nga anibersaryo sang Communist Party of the Philippines (CPP) sang Disyembre 26, gin-ako nila nga sila ang nagpang-harass sa pulis gamit ang command detonated explosive.
Ginpahayag sang NPA nga ang pagpang-harass ang pagpahanumdom sa mga pulis agud indi magpagamit sa National Task Force to End Local Communist Armed Conflict ukon NTF ELCAC.
Nagdepensa man ang NPA nga wala ginadumilian sa international law ang paggamit sang command detonated explosive bangud mapili sang blaster ang target.
Nagapabalik na sa Tubungan ang patrol sang Tubungan Police Station sakay ang 5 ka mga pulis lakip na ang hepe nga si Lt. Jose Rommel Samson sang hinali lang naglupok ang IED nga ginabanta 100 metros ang distansiya sa ila.
Nagsakit ang wala nga siko ni Samson bangud napaso sang shrapnel samtang nagreklamo sang pagpalamungol naman ang iban pa nga mga pulis.
Sa masami, gilayon nga nagapaguwa sang pahayag ang NPA kun maghimo sang pagpang-harass ukon naka-engkwentro ang tropa sang gobyerno.
Sang Disyembre 17 pa natabo ang pagpang-harass apang sang Disyembre 26 lang nagpaguwa sang pahayag ang NPA.
