Ilonggo health care aide sa Alberta, Canada, napatay bangud sa COVID-19

By: Aine Grace Bravo | January 6, 2021

CANADA – Napatay ang Ilonggo health care aide sa Alberta, Canada bangud sa COVID-19.

Base sa report sang Edmonton Journal, si Joe Corral, 61-anyos, ang labing una nga health care worker nga napatay sa Alberta, Canada.

Sa pagpangusisa sang Aksyon Radyo Iloilo News Team, tumandok si Corral sang PHHC Block 17, Mandurriao, Iloilo City.

Nag-migrate sa Canada ang bilog nga pamilya ni Corral sang nakatapos sa pag-eskwela ang iya kabataan.

Ginkasubo naman sang Bethany Riverview, isa ka long-term care home para sa mga tigulang, ang kamatayon ni Corral nga madugay na nga nagatrabaho sa facility.

Base sa report, Disyembre 28, 2020 sang napatay si Corral.

Ginakabig siya nga “hero” sang iya kaabyanan bangud sang iya dedikasyon sa trabaho sa pihak sang COVID-19 pandemic.

Suno sa iya abyan nga si Ephraim Tiangha, wala nag-untat si Corral sa pag-atipan sang mga residente sa Bethany Riverview nga may dementia. | via Edmonton Journal