Pagbasol sa mga babaye kun may malain nga matabo sa ila, may socio-cultural kag historical nga basehan — former UPV Gender Development Program Director, Prof. Rose Asong

Iloilo City — May socio-cultural kag historical nga basehan ang victim blaming ukon pagbasol sa mga babaye kun may malain nga matabu sa ila pareho sa kun mahimuslan sila.

Paathag ni Professor Rose Asong, anay director sang UP Visayas Gender Development Program kag miembro sang Philippine Commission for Women, panahon pa sang mga Katsila ang ginatawag nga gendered spacing sa diin ginakahon ang mga babaye sa isa ka lugar ukon oras.

Bisan nag-moderno na ang panahon, indi gihapon malikawan ang victim blaming, suno kay Professor Asong, ilabe pa nga madugay nga na-condition ang pinsar sang mga Filipinos kun ano ang papel kag lugar sang mga babaye kag lalaki.

May mga pagbag-o naman nga natabu sa subong, suno kay Asong, bangud may mga kurso na agud magbag-o ang panan-awan sang mga tawo, kag may mga laye man nga nagaproteher sa mga babaye. | via Aksyon Hotline