Isa ka kilo sang marijuana, nakuha sa subject sang buy bust operation sa Pavia; subject, nag-ako nga gin-order niya ang items online

By: Aine Grace Bravo | January 8, 2021

PAVIA, Iloilo – Isa ka kilo sang marijuana nga ginabanta nagabalor sang 150,000 pesos ang nakuha sang mga pulis sa subject sang buy bust operation sa Pavia kahapon sang hapon, Enero 7.

Gin-ako sang subject nga si Mark John Wendam, 27-anyos sang Brgy. Aganan, Pavia, nga siya ang nagapanag-iya sang items.

Suno kay Wendam, P22,000 ang iya bakal sa marijuana nga iya gin-order online kag ginpadala sa iya sa courier.

Suno naman kay PMAJ Jojo Tabaloc, hepe sang Pavia Police Station, madugay nila nga gin-surveillance si Wendam antes gin-operate. May una nga nadakpan ang mga pulis, suno kay Tabaloc, nga amo ang nagtudlo kay Wendam nga ila ginakuhaan sang supply.

Pagkatapos nga gin-operate si Wendam, tatlo pa ka “downline” niya ang na-aresto sa nagkalain-lain nga barangay sa Pavia.

Ini amo kanday Darios De La Cruz, Gelgun Catalan kag Jim Ligacion. –via Dave Bucayan