Request ni Iloilo Gov. Arthur Defensor, Jr. nga authority agud makasulod sa confidential agreement sa pagbakal sang COVID-19 vaccines, gin-aprubahan sang Sangguniang Panlalawigan

By: Aine Grace Bravo | January 8, 2021

ILOILO – Gin-aprubahan sang Sangguniang Panlalawigan ang request ni Iloilo Governor Arthur Defensor, Jr. nga hatagan siya sang otoridad nga magsulod sa confidential agreement sa pagbakal sang COVID-19 vaccines sa AstraZeneca.

Ginkumpirmar ni 4th District Board Member Rolly Distura nga wala sang nagpamatok sa hingyo sang gobernador, sa ila ginhiwat nga special session kahapon, Enero 7.

Pwede na makapirma si Gov. Defensor sang agreement kaupod ang AstraZeneca Pharmaceuticals Philippines, Inc., National Task Force Against COVID-19 kag Department of Health.

Ginpabutyag naman ni Vice Governor Christine Garin ng target sang Provincial Government nga una mabakunahan ang 135,000 ka healthcare workers.

Sa subong, mapa-reserve na ang probinsya sa AstraZeneca kag ginalauman nga maabot ang mga bakuna sa third quarter sang tuig. –via BBB/with additional information from Sanggunian in Action