5 pulis sa La Paz Police Station, nagpositibo sa COVID-19

By: Aine Grace Bravo

ILOILO CITY –Nagpositibo sa COVID-19 ang lima (5) ka mga pulis sa La Paz Police Station.

Suno kay PMAJ Edfel Balibadlan, hepe sang La Paz Police Station, apat (4) sa lima (5) ka mga nagpositibo nga pulis ang lunsay naka-home quarantine, samtang admitted sa ospital ang isa bangud nakitaan sang sintomas.

Dugang pa ni Balidbadlan, nagnegatibo naman ang lima (5) ka Persons Deprived of Liberty (PDL) nga naka-close contact sang duha (2) ka preso nga una nagpositibo sa COVID-19.

Enero 8, sang gindul-ong sang personnel sang La Paz Police Station ang duha ka PDL sa Provincial Jail sa Barangay Nanga, Pototan.

Gin-test sang Enero 13 ang duha ka PDL kag January 14, nahibaluan nga nagpositibo sa COVID-19 ang duha ka preso.

Enero 15, gin-swab man ang mga pulis nga nagdul-ong.

Naghimo na sang disinfection ang police station agud malikawan ang paglapta sang balatian, suno kay Balibadlan.

Ginpahayag man ni Balibadlan nga nangayo na siya sang dugang nga 10 ka pulis agud mag-augment sa La Paz Police Station. –via Firingline, January 16, 2021