Passi City public market, temporaryo nga pasiraduhan sang 2 adlaw para sa disinfection kasunod sang pagpositibo sa COVID-19 sang 7 vendors

PASSI CITY, Iloilo – Temporaryo nga pasiraduhan ang Passi City Public Market sang duha ka adlaw para sa disinfection kasunod sang pagpositibo sa COVID-19 sang pito ka mga vendors.

Suno kay Passi City Mayor Stephen Palmares, siraduhan ang merkado sugod subong nga adlaw, Enero 26 tubtob buwas, Enero 27.

“The City Government will conduct disinfection… and we need to temporarily close our market. I ask for your patience and understanding regarding this matter,” suno kay Palmares.

Ginmandu man sang alkalde ang pagpaidalom sa RT-PCR test sang tanan nga vendors sa merkado. Indi pagpasugtan nga makabukas sang ila pwesto ang vendor nga wala sang negatibo nga resulta.

Nagapangabay sang paghangop ang alkalde bangud sa sitwasyon.

Sa subong, ang Passi City may 315 ka total COVID-19 cases – 71 pa ang active, 241 ang naka-recover kag tatlo ang nagkalamatay. –via Firingline, January 25, 2021