COVAC PLAN 2021-2022 SANG ILOILO PROVINCE, NATAPOS NA –GOV. DEFENSOR

By: Aine Grace Bravo | February 1, 2021

ILOILO – Natapos na ang COVID-19 Vaccine Deployment and Immunization Plan 2021-2022 (COVAC) plan sang probinsya sang Iloilo.

Suno kay Gov. Arthur Defensor, Jr., ang framework sang Department of Health ang ginbasehan sang Provincial Government sa paghimo sang multi-component plan halin sa pagpili sang bakuna, pagbakal sang bakuna tubtob sa actual vaccination. Nalakip man diri ang pag-identify sang mga vaccinators, cold storage chain facility kag ang monitoring pagkatapos sang pagpangbakuna.

Subong nga semana, maga-issue sang executive order ang gobernador nga maga-adoptar sang COVAC plan 2021-2022 kag diskusyunan ini upod sa Civil Defense Cluster.

Magahimo naman ang kampanya ang Provincial Government agud magpaathag kag kumbinsihon ang mga pumuluyo sa pagpabakuna sang COVID-19 vaccine.

Gin-ako sang gobernador nga manubo sa 50 porsyento ang gusto nga magpabakuna base sa man pagpa-survey niya sa mga healthcare workers. –via Aksyon Radyo Iloilo