Maglive-in nga senior citizens, patay sang gintiro sa Alimodian, Iloilo

By: Aine Grace Bravo | February 2, 2021

ALIMODIAN, Iloilo – Patay ang mag-live in partner nga senior citizens sang gintiro sa Barangay Malamboy-Bondolan, Alimodian kagab-i, Pebrero 1.

Ginkilala ang mga biktima kanday Areston Alves, 62-anyos nga may pilas sa tuo nga mata kag likod, kag Georgina Miller, 60-anyos nga may pilas sa ulo kag guya.

Suno kay PCPT Sullen Domingo, hepe sang Alimodian MPS, may nabatian nga sunod-sunod nga lupok antes nasapwan ang mga biktima.

Nakita sa guwa sang pwertahan si Areston, samtang sa kuwarto si Georgina. 

Naga-coordinate ang Alimodian police sa Scene of the Crime Operatives sa ginahimo nga imbestigasyon.

Gin-ako ni PCPT Domingo nga wala pa sila sang ginasunod nga anggulo sa krimen.

Mabuot man ang pagkilala sang ila mga kasilingan sa mga biktima, suno sa hepe. –via Jorge Cabrera