Pulis sa Negros Occidental, nagpositibo sa drug test — PRO 6 Director Rolando Miranda
Negros Occidental — Nagpositibo sa drug test ang pulis sa Negros Occidental Police Provincial Office.
Base sa resulta sang drug test, nagpositibo sa presensiya sang methamphetamine ukon shabu ang urine sample sang pulis.Sa impormasyon sang Aksyon Radyo Iloilo, may rangko PChief Master Sergeant ang pulis nga nagpositibo.
Suno kay Police Regional Office 6 Director Rolando Miranda, gin-relieve na niya kag ginpasakaan sang kaso ang pulis nga nagpositibo.
Luyag ni Miranda nga ma-dismiss sa serbisyo ang natungdan nga pulis.
Nagpakig-angut ang Aksyon Radyo Iloilo kay Lt. Colonel Joem Malong, Spokesperson sang PRO6 para sa dugang nga detalye apang wala pa siya nakahatag sang pahayag.
Nagpakig-angut man ang Aksyon Radyo Iloilo sa NOPPO kag gintugyan nila ang pagsabat sa PRO6 bangud na-relieve na ang natungdan nga pulis.
Disyembre 8 sang nagligad nga tuig sang nag-conduct man sang random drug test ang Crime Lab 6 kag natukiban nga may pulis nga may rangko Corporal nga nagpositibo man sa drug test.
Isa sa mga gin-implementar nga lihok ni Miranda sa pagpungko nga director sa PRO6 amo ang pag-subject sang drug test sa tanan nga mga pulis sa rehiyon.
