Kaundan sang COVAC Plan 21-22, gin-release sang Iloilo Provincial Government

By: Aine Grace Bravo | February 5, 2021

ILOILO – Ginpagguwa na sang Iloilo Provincial Government ang kaundan sang COVID-19 vaccination program.

Naplastar sa COVID-19 Vaccine Deployment and Immunization Plan 2021-2022 ukon COVAC PLAN 21-22 ang overall framework kag operational plan para sa deployment kag vaccination sa bug-os nga probinsya. Nalakip diri ang pag-identify sang mga vaccinators, cold storage chain facility kag ang monitoring pagkatapos sang pagpangbakuna.

Base sa plano, iga-mobilize sang Provincial Government ang bilog nga bureaucracy, nga ginalakipan sang tanan nga munisipalidad kag isa ka component city, mga pribado nga sector, socio-civic organizations, non-governmental organizations kag tanan nga volunteer groups sa probinsya.

Gin-isyu ni Iloilo Governor Arthur Defensor, Jr. kahapon, Pebrero 4, ang Executive Order No. 036, series of 2021 nga naga-adoptar sang COVAC PLAN 21-22.

INFORMATION DISSEMINATION

Magahimo ang Provincial Government sang lapnagon nga information dissemination drive antes i-implementar ang COVAC Plan 21-22.

Suno kay Gov. Defensor, importante ini agud mapahangup sa publiko ang programa kag makuha ang ila matuod nga sentimento antes magpabakuna.

Ginapasiguro sa COVAC Plan nga mahatagan sang libre, epektibo, safe kag high quality nga mga bakuna kontra sa COVID-19 ang pumuluyo. I-prioritize sa first phase ang mga pinaka-at-risk kag vulnerable nga populasyon pareho sang frontline health workers, senior citizens, indigent, uniformed personnel kag ang may comorbidities.

Nasumiter na ni Defensor ang kopya sang plano sa Department of Health, DILG kag regional Inter-Agency Task Force agud ma-synchronize ang COVAC Plan sa vaccination program sang national government. Nagahulat pa ang gobernador sang ila nga feedback. –via Balita Halin sa Kapitolyo