Kadamuan sa bag-o nga mga kaso sang COVID-19 sa Iloilo City, mga frontliners — Iloilo City COVID-19 Team
ILOILO CITY – Nagsaka ang kaso sang COVID-19 sa Iloilo City sa una nga semana sang Pebrero 2021.
Suno kay Iloilo City COVID-19 Team Spokesperson Jeck Conlu, “Kun makita ninyo ang data naton nagsaka. Damo diri ang mga frontliners naton pareho sa Philippine Coast Guard, Bureau of Immigration kag subong may ara kita sa aton nga mga health centers. May mga doctor man kita sa siyudad kag may mga nurses man kita nga nag-COVID [19] positive.”
Bangud sini, gina-review ang procedures sa mga health centers kag ospital sa siyudad kag sa iban pa nga frontline offices.
May mga nagpositibo man nga Locally Stranded Individuals (LSIs), returning overseas Filipinos (ROFs) kag Authorized Persons Outside Residence (APOR).
Ginpahayag man ni Conlu nga wala sang aktibidad ukon gatherings nga gintambungan ang mga bag-o nga kaso sa siyudad.
Natukiban suno sa iya ang pagpositibo bangud sa aktibo ang contact tracing kag masangkaron nga random testing sa mga frontliners.
“BALIK SA BARANGAY”
Mahimo sang random testing sa COVID-19 sa mga lugar nga madamo ang nagabatyag sang sintomas pareho sang flu like symtoms sa mga barangay sa siyudad, suno kay Conlu.
Ginmanduan na ang Barangay Health Emergency Response Team (BHERT) parte diri bangud nagadumdom ang pila ka residente nga ordinaryo lang ini nga trangkaso bangud man sa panahon.
Ginatutukan gid ini suno sa iya agud ma-test kag ma-isolate ang pasyente.
Halin Pebrero 1 tubtob 4, 54 ka kaso ang na-record sa siyudad.
