Good Samaritan, ginsabat ang P350,000 nga hospital bill sang 18-anyos nga solterito nga nakuryente; pamilya, tuman ang pasalamat sa nagbulig

By: Aine Grace Bravo | February 8, 2021

ILOILO CITY – Naghilibiun sa kalipay ang pamilya sang 18-anyos nga lalaki nga nakuryente sa gina-construct nga housing project sa Barangay Bolilao sang ila nahibaluan nga may nagbulig sa pagbayad sa ila hospital bill nga malapit sa P400,000.

Nahibaluan ni Maricel Deocariza, magulang sang pasyente nga si Romel nga may nagbayad sang P350,000 sa ospital sang Pebrero 5, 2021.

Kasunod ini sang pagbalita sang Aksyon Radyo Iloilo sa natabo sa iya nga manghod.

Suno kay Maricel, dako gid ang nabulig sang kantidad bangud nabuhinan ang ila hospital bill.

Nagpangabay naman sa Aksyon Radyo ang nagbayad sa ospital nga indi siya paghingadlan.

Manug-isa na ka bulan nga na-admit sa ospital si Romel halin sang nakuryente siya sang Enero 9, 2021.

Ginpahayag naman ni Maricel nga wala na naka-contact pa sa ila ang contactor sang housing project. –via KhenJo Terco