LTO 6 Director, nagpa-athag matapos gin-isnab sang iya opisina ang consultative meeting may kaangtanan sa PMVIC sang Transportation Committee sang Iloilo City Council

By: Aine Grace Bravo | February 8, 2021

ILOILO CITY – Nag-sorry sa Iloilo City Council si Land Transportation Office 6 Director Eric Tabaldo matapos nga wala sang tiglawas nga nagtambong sa consultative meeting may kaangtanan sa implementasyon sang Motor Vehicle Inspection System.

Suno kay Tabaldo, may ‘miscommunication’ nga natabo rason nga wala may nagtambong sa meeting nga ginhiwat sang Pebrero 5.

Dugang pa ni Tabaldo, una niya nga ginhambalan si LTO 6 Asst. Regional Director Gaudioso Geduspan nga magkadto sa meeting. Apang nag-assume si Geduspan nga si Atty. Allan Sacramento ang matambong bangud siya ang designated spokesperson sang opisina.

‘I was not informed’

Ginpahayag naman ni Sacramento nga wala siya na-inform nahanungod sa consultative meeting.

Iya man ginpanginwala nga may nabaton siya nga text ukon tawag halin kay Iloilo City Councilor Romel Duron, chairman sang Committee on Transportation sang City Council, nga amo ang nagpatawag sang consultative meeting.

Suno naman kay Councilor Duron, gintawgan niya kag gin-text si Sacramento sa numero nga ginhatag man sang LTO 6 personnel.

Liwat nga napatawag sang meeting si Duron sa Mierkules, Pebrero 10. – via Brian Valle