Pag-fill out sa contact tracing form, madugay na ginapatuman sa mga nagasulod sa lodging houses sa Iloilo City –TFMVF head

By: Aine Grace Bravo | February 10, 2021

ILOILO CITY – Gin-athag ni Task Force on Morals and Values Formation (TFMVF) Head Nestor Canong nga sang nagligad pa nga tuig gina-require ang pag-fill out sa contact tracing form sa mga naga-check-in sa mga lodging houses sa siyudad.

Suno kay Canong, mandatory requirement sa mga accommodation establishments pareho sang lodging houses nga magsumiter sang COVID-19 plan sa Department of Tourism 6, kag nalakip ang contact tracing form sang nagsaka ang kaso sa siyudad sang nagligad nga tuig.

Compliant, suno sa iya, ang mga lodging houses sa pagsunod sini bangud ginpangayuan sila sang kopya sang task force.

Ginakuha ang pangalan, contact number, address, adlaw nga nag-check-in kag pirma sang mga kliyente. Gina-check man ang temperature sang mga naga-check-in.

Ginpasiguro ni Canong nga ginasunod gid ang minimum health protocols sa mga lodging houses sa siyudad.

Padayon ang pag-apelar sang task force sa publiko nga mag-kooperar ilabe pa nga nagahilapit ang Valentine’s Day. – via Firingline