COVID-19 vaccination simulation sang Iloilo province, suguran sa Pebrero 19 –Gov. Defensor

By: Aine Grace Bravo | February 17, 2021

ILOILO – Hiwaton sa lima ka banwa ang COVID-19 Vaccination simulation ukon Time and Motion Exercise sang Iloilo Provincial Government, suno kay Governor Arthur Defensor Jr.

Tuyo sang aktibidad nga mahibaluan kun paano i-apply kag i-operationalize ang COVID -19 Vaccines kun mag-abot na sa probinsya.

May himu-on nga  actual vaccination agud mahibalu-an kun pila ka oras ang i-alokar sa 100 frontliners kag kun ano ka lawig ang pagbakuna sa kada frontliner.

Kalakip man sa simulation ang pag-manage sa transportation, cold chain facility, number of minutes asta nga maka-inject, kag waiting period kun may yara sang adverse effect.

Himuon sa Biernes, Pebrero 19 sang aga, ang simulation sa Oton sa 1st District. Sa Pebrero 22 naman ang exercise sa Zarraga para sa 2nd district; Pebrero 23 sa Badiangan para sa 3rd District; Pebrero 24 sa Dueñas sa 4th District kag Pebrero 26 sa Concepcion para sa 5th District. – via Mario Gelongo