Validation sang road clearing report sa Iloilo City, wala pa masuguran –City DILG

By: Aine Grace Bravo | February 17, 2021

ILOILO CITY – Wala pa masuguran ang validation sa road clearing operations report sa Iloilo City.

Suno kay City DILG Director Oscar Lim, ginalauman nga ma-umpisa ang validation sa Pebrero 23, 2021 nga pangunahan sang taga-DILG Iloilo Province.

Gin-athag ni Lim nga sakop lang sang validation ang mga city kag barangay roads kag wala madala ang mga national roads.

Isa lang ka city ukon barangay road ang i-validate sa kada distrito magluwas sa City Proper nga duha ang i-validate.

Sang nagligad nga tuig, ang team halin sa Bacolod City ang nag-validate sa report sang Iloilo City.

Nagapati si Lim nga kun i-sanction sang DILG si Iloilo City Mayor Jerry Treñas pananglitan indi makapasar sa validation, posible nga mabalikan man ang mga barangay officials.

Katungdanan sang barangay council, suno sa iya, ang mga barangay roads.

Gin-anunsyar sang DILG nga nagsugod sang Pebrero 16 ang validation sa report sang mga local government units (LGUSs) sa ginhimo road clearing operation 2.0 kag magatakup sa Marso 2, 2021. – via Firingline, Pebrero 16, 2021