71% sang mga residente sa Iloilo City, indi luyag magpabakuna para sa COVID-19 — City Government
Iloilo City — 71% sa mga residente sa syudad ang indi luyag nga magpabakuna para sa COVID-19 base sa na-account nga resulta sa COVID-19 Vaccine Consent Form sang Iloilo City Government as of February 16.
Sa pagpangusisa sang Aksyon Radyo Iloilo, 9,731 ka mga consent forms halin sa 88 pa lang ka mga barangay sa syudad ang na-account sang Iloilo City Government.
6,863 ukon 71% sa amo nga numero ang indi magpabakuna samtang 2,868 ukon 29% naman ang luyag magpabakuna.2,059 ka mga residente nga nakasabat na ang halin sa City Proper; 2,454 sa Mandurriao; 2,016 sa Molo; 1,087 sa Jaro; 1,375 sa Lapaz ;598 sa Arevalo; kag 142 sa Lapuz.
Duha ka semana na sang nagsugod ang Iloilo City Government sa pagpasabat sa COVID-19 Vaccine Consent paagi sa mga barangay officials agud mahibaluan ang sentimiento sang mga residente lakip na sa mga boarders sa syudad.
May mga forms nga wala pa na-account sang Iloilo City Government. Sa impormasyon sang Aksyon Radyo Iloilo, sa baylo manual, plano nila nga himuon online ang pagpasabat.
Ano ang kaundan sang consent form?
Katunga sang long size bond paper ang COVID-19 Vaccine Consent Form.Ginapasabtan sa front part ang personal information sang natungdan kag diri man nahamtang ang basic information natuhoy sa vaccination.Sa back part naman sang form ginapamangkot ang medical history kag travel history sang natungdan.
May disclaimer man nga ang AstraZeneca, ang bakuna nga pagagamiton, ang na-issuehan sang Emergency Use Authorization kag ‘under study’ pa ang long term effects kag epekto sini sa mga may comorbidity ukon balatian.
Kinahanglan pirmahan sang natungdan ang iya desisyon sa pagpabakuna.
Kinahanglan man pirmahan sang kapitan sa barangay ang consent form sang natungdan nga residente.
Suno kay Mayor Jerry Treñas, ang mga indi luyag magpabakuna base sa consent form ang mahimo sa gihapon makabaton sang bakuna apang unahon anay ang mga luyag magpabakuna.
Dugang niya, kinahanglan magpabakuna agud maproteksunan ang kaugalingon kag amat-amat nga maka-recover sa COVID-19.600,000 doses sang Astrazeneca vaccine nga sarang gamiton sa 300,000 indibidwal ang gin-order sang Iloilo City Government sa AstraZeneca sa balor nga US$3-Million.
‘Ipa-athag sa ila ang importansiya sang pagpabakuna’
Suno kay Association of Barangay Captains -Iloilo City Spokesperson kag Calumpang, Molo Punong Barangay Roberto Niño, ginapaidalum sa seminar ang mga barangay health workers kag barangay nutrition scholars agud makahibalo sang insakto nga impormasyon sa pagpabakuna.
Paagi sini, makahatag man sila sang insakto nga impormasyon sa mga residente sa bulig sang mga day care workers kag Barangay Service Point Officers.