Magtiyo sa Guimaras, nagbugsay sang kapin 15 oras tubtob nakalab-ot sa Negros Occidental matapos na-aberya ang ila sakayan
Napilitan nga magkaon sang hilaw nga isda agud makasapin-sapin sa ila nga gutom ang magtiyo nga sanday Stephen Malapitan, 22 anyos kag Modesto Balidiong, 52 anyos sang Brgy. La Paz, Nueva Valencia, Guimaras matapos nagpa-utaw utaw sa lawod sang kapin 15 ka oras sang na-aberya ang makina sang ila sakayan sa pagpangisda.
Nakalab-ot sa Cauayan, Negros Occidental ang duha bangud sang padayon nila nga pagbugsay. Pebrero 16 sang kaagahon, nagpalawod ang magtiyo agud magpangisda sa Unisan Island nga sakop man sang Nueva Valencia.
Mapauli na kuntani sila mga las 10 sang aga sang amo man nga adlaw apang na-aberya ang makina sang ila sakayan.
Bangud sini nagbugsay na lang sila. Indi man sila makapadulong sa Guimaras bangud sang dalagko nga balod gani ginpakamaayo nila nga magsunod padulong sa direksyon sang hangin kag balod.
La 1:30 sang kaagahon na sang Pebrero 17 sila naka-abot sa Cauyan. Yara na sa maayo nga sitwasyon ang duha apang wala pa ginpasugtan sang taga-coast guard nga magbiyahe pabalik sa Guimaras.
