Mga dapat i-evacuate sa Carles bangud sa Bagyo Auring, gin-identify na; Mga evacuation centers, preparado na
By: Jo Maque | February 21, 2021
CARLES, Iloilo – Natumod na sang mga barangay officials sa Carles ang mga residente nga dapat i-evacuate bilang preparasyon sa paglabay sang bagyo Auring.
Suno kay Carles Mayor Siegfred Betita, preparado na ang mga eskwelahan nga himuon evacuation centers lakip ang mga island barangays sang banwa.
May ginpahamtang nga operations center ang banwa nga maga-monitor sa bagyo Auring.
May text brigade man ang mga punong barangay kag dapat nga magpahibalo sila kada oras sang sitwasyon sa ila lugar.
Ginkumpirmar man sang alkalde nga wala na ginpasugtan ang mga magagmay nga mangingisda nga magpalawod bangud sa dalagku nga balod agud malikawan ang aksidente.
Ginmanduan ang mga personnel sang Philippine Coast Guard, PNP, Bantay Dagat nga hugot gid nga bantayan nga wala sang may makapangisda.
Gin-untat naman ang byahe padulong sa Isla Gigantes. Nagapati si Betita nga posible mahagan-hagan ang kahalitan sang bagyo kun preparado ang mga residente.
Gina-forecast nga mabatyagan ang bagyo Auring sa Iloilo sa Domingo sang gab-i (Pebrero 22) ukon Lunes sang aga (Pebrero 23).
