2 mangingisda nga taga-Sipalay, Negros Occidental nga gin-report missing, na-rescue sa Zamboanga del Norte

ZAMBOANGA DEL NORTE – Na-rescue sa Sitio Pamatangan, Barangay Balagunan, Siocon, Zamboanga del Norte ang duha ka mangingisda halin sa Sipalay City, Negros Occidental nga una gin-report na-missing.

Suno kay Moki Alagao, nagpalawod ang iya amay nga si Alexander, 73-anyos sang Barangay 5, Sipalay, upod si Rico Norkia, 57-anyos, sang Pebrero 17. Pero nadula sila samtang papuli.

Nakatawag pa sila sa Bantay Dagat sang Sipalay sang Pebrero 18 sang sila ang nagapapuli agud magpa-rescue kuntani bangud sang dalagku nga balod kag madlos nga hangin. Pero gulpi lang nautod ang tawag.

Na-rescue ang duha sang mga personnel sang Barangay Disaster Risk Reduction and Management Council sang Barangay Balagunan sang Pebrero 22, mga las-5 sang hapon.

Estable na ang kondisyon sang duha.

Una na nga nagpanawagan sa Aksyon Radyo Iloilo ang pamilya Alagao agud madasig nga makita ang duha.