Ceres bus kag delivery truck, nagbunggu-anay sa Barotac Nuevo; Driver sang truck, patay
By: Jo Maque/Aine Grace Bravo | February 25, 2021
Barotac Nuevo, Ilo — Patay ang driver sang elf truck sang nakabunggo sa Ceres bus sa Zone 4, Barangay Cabilauan, Barotac Nuevo sang Pebrero 24 sang aga.
Pareho nga wasak ang atubang sang bus kag truck bangud sa impact sang pagbunggu-anay.
May karga nga mga bombay kag iban pa nga produkto ang elf truck nga ginamaneho ni Johnny Delariarte, 46-anyos, kagawad sa Barangay Padios, Sara.
Nagabiyahe naman pakadto sa siyudad sang Iloilo ang bus nga ginamaneho ni Roel Caguindangan sang Concepcion, Iloilo.
Naipit ang driver sang bus pero nakuha na kag nadala sa ospital. May mga pilason man sa mga pasahero suno, pero lunsay menor lang suno kay John Cataluña nga natabuan nga nakalabay sa lugar sang natabu ang aksidente.
Ginkumpirmar naman ni Kauswagan, City Proper Punong Barangay Woody Delariarte nga manghod niya nga si Johnny “Bonbon” Delariarte.
Bag-o suno sa iya ang truck sang iya manghod. Nagpangompra sa Iloilo Terminal Market si Johnny bangud nga may negosyo siya sa Sara.
Suno naman kay Mr. Joseph Uyco, Admin Manager sang Vallacar Transit Iloilo, abagahon nila ang gasto sa ospital.
Ginahulat man nila ang imbestigasyon sang police, pero handa magpakig-istorya ang management sa pamilya ni Delariarte.