Numero sang mga healthcare workers sa mga COVID-19 referral hospitals sa Western Visayas nga mapabakuna sang COVID-19, nagnubo sang nahibaluan nga Sinovac vaccine ang gamiton
ILOILO CITY — Nagnubo ang numero sang mga health care workers halin sa COVID-19 referral hospitals sa Western Visayas nga magpabakuna sang nahibaluan nila nga Sinovac COVID-19 vaccine ang gamiton sa pagpangbakuna.
Ini suno kay Dr. Mary Jane Juanico, designated spokesperson sang Department of Health 6 kasunod sang ila latest nga survey.
Sa una nga survey suno kay Juanico, 50 tubtob 70 percent sa mga health care workers ang handa nga magpabakuna pero nagnubo ini sa 20 tubtob 30 percent sang nahibaluan nila nga Sinovac vaccines ang gamiton sa rehiyon.
Ginpahayag pa ni Juanico nga ang latest nga survey ang ila nga basehan sa paghatag sang bakuna sa COVID-19 referral hospitals nga ginalakipan sang Western Visayas Medical Center, West Visayas State University Medical Center, Iloilo St. Paul’s Hospital, Iloilo Doctor’s Hospital sa Iloilo City kag duha ka ospital sa Bacolod City.
Ginhataganan sang ultimatum ang anum ka hospital sa rehiyon nga i-finalize ang listahan sang mga mapabakuna tubtob sa Lunes, Marso 8.
DELIVERY SA BAKUNA SA MGA OSPITAL
Na-deliver na sang DOH 6 sa duha ka ospital sa Iloilo City ang bakuna para gamiton sa first dose. 500 doses ang gin-deliver sa WVMC samtang 400 doses naman ang nahatag na sa ISPH.
Subong nga adlaw, Marso 6, naman i-deliver ang tag-500 doses sa WVSUMC kag IDH.
I-deliver naman ang bakuna para sa second dose kun ma-consume na ang para sa first dose kag mabakante na ang tagsa ka cold chain equipment sang kada ospital.
Samtang wala pa, yara lang anay sa regional cold room sang DOH 6 ang bakuna.
Base sa guidelines sang Sinovac suno kay Juanico, ihatag ang ikaduha nga dose makaligad sang 28 ka adlaw.
INDI REQUIRED NGA MAG-GLOVES ANG VACCINATORS
Wala gina-rekomendar DOH 6 sa mga vaccinators nga maggamit sang gloves kun magpangbakuna.
Suno kay Juanico, ang minimum requirements bilang kabahin sang ila infection, prevention and control amo ang pagsuksok sang face mask kag face shield.
“Gina-discourage” gid nila suno sa iya ang paggamit sang gloves bangud luyag nila nga magpanghinaw ukon mag-sanitize sang kamot ang vaccinators, antes ukon pagkatapos sang pagpangbakuna gamit ang alcohol.
Kun nagasuksok sang gloves suno sa iya, posible nga makalimtan sang vaccinators nga magpang-sanitize.
Sa kabug-usan, 28 na ang nabakunahan sa COVID-19 sa Western Visayas sa diin 22 halin sa ISPH kag anum halin sa Bacolod City. –via Firingline
