Hinablos nga ginbuno sang iya tiyo sa Banate, na-ospital

Iloilo — Na-ospital ang hinablos bangud ginbuno sang iya nga tiyo sa Brgy. Juanico, Banate pasado las 10 kagab-i, Marso 6.

Suno kay PSSG John Baylon, imbestigador sang Banate MPS, pasado las 12 na sang nagpahibalo ang pamilya sa pulis may kaangtanan sa insidente.

Sa imbestigasyon ni Baylon, ginsaway sang tiyo nga si Enicito Juanico, 58, ang iya hinablos nga si Alvin Bayogos, 30, nga magpauli na bangud nagawinakal kag naka-inum.

Ginpahayag niya nga may komosyon nga natabo sa tunga sang tiyo kag hinablos.

Ginpapuli sang pamilya ang hinablos kag nagpauli man ang tiyo. Makaligad ang pila ka minutos, ginkadtuan sang hinablos ang tiyo kag ginbulya-bulya ang pwerta sang ila nga balay.

Ginsaway sang tiyo ang hinablos nga mag-untat apang wala nagpamati.

Na-impito ang tiyo suno kay Baylon rason nga ginbuno niya ang hinablos kag naigo sa wala nga bahin sang tiyan.

Ginpahibalo gilayon sang tiyo ang pamilya kag gilayon man nga gindala sa ospital ang biktima.Gin-detain sang Banate police ang tiyo.