100 DOSES SANG COVID-19 VACCINE HALIN SA DOH 6, NAG-ABOT NA SA GUIMARAS

By: Aine Grace Bravo | March 11, 2021

GUIMARAS – Nabaton na sang Guimaras Provincial Government ang ila una nga alokasyon sang CoronaVac, ang bakuna batuk sa COVID-19 nga gin-develop sang Chinese biopharmaceutical compan nga Sinovac Biotech Ltd.

100 doses sang CoronaVac ang ginpadala sang Department of Health 6 sa Guimaras subong nga adlaw, Marso 11.

Gin-welcome nanday Governor Samuel Gumarin, Guimaras Lone District Representative Ma. Lucille Nava, Dr. Nilda Baingan sang Provincial Department of Health Office – Guimaras kag Provincial Health Officer Dr. NL Cathrel Nava ang mga bakuna sa Ro-Ro Wharf sa Jordan.

Gilayon nga gindala ang mga bakuna sa storage facility sa Provincial Health Office.

Una nga mapabakuna sang CoronaVac ang mga frontline health workers sang Dr. Catalino Gallego Nava Provincial Hospital, Buenavista Emergency Hospital kag Nueva Valencia District Hospital.

Nagpasalamat naman si Gov. Gumarin sa DOH kag national government sa nabaton nga mga bakuna.

“Nagapasalamat kita sa Department of Health kag sa national government naton nga isa ang probinsiya sang Guimaras sa mga nahatagan sang vaccines. Very vital gid ini sa away naton sa COVID-19 pandemic. Kinahanglan sang aton mga frontline health care workers sang armas nga ibato sa pagpakig-away sini nga virus. Ang vaccine lang ang paglaum naton nga makabalik kita gamay sa normal,” suno kay Gumarin.

Ginaproseso man sang Provincial Government sang Guimaras ang pagbakal sang dugang nga COVID-19 vaccines para sa mga Guimarasnon. –with reports from Province of Guimaras