Number 1 most wanted person sa Tigbauan, Iloilo, patay sang ginpahayag nagbato sa mga pulis sang ginserbehan sang warrants of arrest sa Antipolo City, Rizal
ANTIPOLO CITY, RIZAL – Patay ang number 1 most wanted person sang Tigbauan, Iloilo sang ginpahayag nga nagbato sa mga otoridad sang ginserbehan sang warrants of arrest sa Barangay Sta. Cruz las 6:50 sang gab-i, Marso 10.
Ginkilala ang napatay kay Reagan Gepulango nga may anum ka mga warrants of arrest.
Lakip sa mga kaso ni Gepulango ang Carnapping, Attempted Murder, Attempted Homicide, kag Murder.
Magluwas sa subject, napatay man ang upod niya nga wala pa makilala.
Base sa spot report, nagapasulod sa back door sang balay nga ginateniran ni Gepulango ang mga otoridad sa pagpanguna ni PLTCOL Morgan Aguilar sang Anti-Kidnapping Group Luzon Field Unit agud i-serbe ang warrants apang ginpalukpan sila sang pusil sang subject.
Nagbalos man sa pagpalupok ang mga pulis tubtob nga naigo si Gepulango kag ang iya upod.
Na-recover sang mga otoridad sa sulod sang balay ang isa ka Ingram Cal. 9mm nga may magazine; duha ka cal. 45 nga may magazine; kag suspected shabu.
Gintudlo si Gepulango nga involved sa pagpatay kay Jose Lego sa Tigbauan sang April 26, 2012 kabangdanan nga ginpasakaan siya sang kaso nga murder with use of unlicensed firearms upod sa iya nga grupo.
