DOH 6, wala sang “sense of urgency” sa rollout sang COVID-19 cases suno kay Iloilo City Mayor Jerry Treñas

By: Aine Grace Bravo | March 12, 2021

ILOILO CITY – Ginreklamo ni Mayor Jerry Treñas ang indi gilayon pag-rollout sang Department of Health 6 sang mga COVID-19 vaccines bisan nag-abot na sa Western Visayas.

Suno kay Treñas, indi bangrus ang bakuna nga kinahanglan i-freeze bangud kinahanglan ini gilayon nga ipang-distribute sa mga ospital agud gilayon man nga magamit para sa mga healthcare workers.

Dugang niya, wala sang ‘sense of urgency’ ang DOH 6 ipaanggid sa mga Local Government Units.

Ginpahayag naman ni Treñas nga nabudlayan siya sa pagtrabaho upod sa DOH 6 bangud wala man naga-coordinate sa Iloilo City Government natuhoy sa nag-abot nga supply.

Padayon sa pag-monitor ang alkalde sa vaccination rollout sa rehiyon pagpanguna sang DOH 6.

Nagalaum naman si Treñas nga na-intindihan sang DOH 6 ang instruksyon ni National Task Force Against COVID-19 deputy chief implementer Sec. Vince Dizon sa gilayon nga pagpang-distribute sang bakuna.

Nag-abot sa Iloilo si Dizon kahapon, Marso 11, kag ginpangunahan ang pagpangbakuna sa St. Paul’s Hospital Iloilo. – via Aljohn Torreta