ArchivesLokal

Mangingisda, patay samtang nagakay-o sang tangkal-tangkal sa pagpangisda sa Barotac Viejo

By: Aine Grace Bravo | March 12, 2021

BAROTAC VIEJO, Iloilo – Patay ang mangingisda matapos nalumos samtang nagasalom sa gina-obra nga tangkal-tangkal nga ginagamit sa pagpangisda sa baybayon sang Barangay San Francisco, Barotac Viejo mga las-3:30 kahapon sang hapon, Marso 11.

Gindala pa sa Barotac Viejo District Hospital si John Rex Balayo, 29-anyos, pero gindeklarar nga dead-on-arrival.

Suno kay PMAJ Kenn Albert Lepsia, hepe sang Barotac Viejo Police Station, nagpalawod si Balayo upod sa duha pa ka mangingisda agud kay-uhon ang tangkal.

Ginpahayag ni Lepsia nga ginsaway sang iya mga abyan si Balayo nga indi na magbulig bangud naka-inom siya, pero nagsalom gihapon kag wala na nakabutwa.

Nagpangayo sang bulig ang duha, kag nagresponder ang taga-Bureau of Fire Protection kag mga pulis pero wala gid natabangan si Balayo. – via Francisco “Kikik” Enar