Pulis, barangay kagawad, pilason sang naglupok ang IED sa Brgy. Pughanan, Lambunao
By: Aine Grace Bravo | March 12, 2021
LAMBUNAO, Iloilo – Maayo na ang kahimtangan sang duha ka pulis sang Lambunao Police Station nga napilasan sang naglupok ang “hanging” improvised explosive device (IED) sa Barangay Pughanan, Lambunao kaina sang aga, Marso 12.
Suno kay PMAJ Jogen Suegay, hepe sang Lambunao MPS, mapadulong kuntani ang siyam (9) ka pulis sa Brgy. Panuran, Lambunao agud maghimo sang follow-up investigation sa natabu nga engkwentro sang NPA rebels kag tropa sang Retooled Community Support Program sang Philippine Army nga nagabantay sa mga construction equipment kahapon sang hapon, Marso 11.
Ginabanta suno sa iya sa 15 metros ang kalayuon sang patrol car sang Lambunao MPS sa naglupok ang IED.
Sang naglupok ang IED, napilasan sanday PSMS Christopher Losbañes nga may igo sang shrapnel sa wala nga kamot kag PSSg Jessie Fusin nga nakibyasan sa likod sang iya ulo, dugang ni Suegay.
May nakita ang isa sa mga pulis nga duha ka tawo nga nagpalagyo halin sa ginluntaran sang insidente pagkatapos sang paglupok sang IED. Pero sa kabug-usan suno sa iya, ginabanta 10 ka mga ginapatihan miyembro sang NPA ang responsable sa natabo.
Ginkumpirmar man ni Suegay nga maayo naman ang sitwasyon ni Pughanan Barangay Kagawad Larry Ajeno nga nasalabat sang bala kag naiguo sa wala nga tiil.
Ginahibalo pa kun sin-o ang nakaigo sa kagawad. –Via Firingline, BBB, Aksyon Brian Valle
