2 pilason lakip ang menor-de-edad sang gintiro sa City Proper
ILOILO CITY — Duha ang napilasan lakip ang menor-de-edad sang gintiro sa Tanza Timawa Zone 2, City Proper, las-12:45 kaina sang kaagahon, Marso 13.
Suno kay Police Major Mark Evan Salvo, hepe sang City Proper police station nga base sa pagpangusisa niya sa mga biktima, nagalakat si Richard Bajon 19-anyos upod ang 16-anyos nga menor-de-edad nga lunsay mga residente sang North Baluarte, Molo sang may naglabay nga mga lalaki nga naga-angkasanay sa motorsiklo kag ginpahayag diutayan lang sila nabungguan.
Gin-ako sang mga biktima suno kay Salvo nga nagpundo sa unhan ang motorsiklo kag nagpanaug ang mga suspetsado kag sang paglabay nila, ginsipa sang solterito ang motorsiklo rason nga natumba.
Nagpalagyo pa sila pero ginlagas sila sang mga suspek sakay sa motorsiklo kag gintiro.
Naigo sa tyan kag tuo nga kamot si Bajon samtang napilasan sa wala nga paa ang menor-de-edad.
Madasig man nga nagpalagyo ang mga suspetsado. Base naman sa ginsugid sang mga nakakita, antes natabo ang insidente, nagalakat sa Ledesma Street ang mga biktima upod sa tatlo pa gid nila ka mga abyan nga ginpahayag mga nakainom kag nagapanglampos sang botelya.
Gindugang pa sang nakakita nga ginsipa sang solterito ang motorsiklo nga naka-park sa kilid sang karsada rason nga natumba kag ginpalibutan pa nila nga lima.
Ini ang rason nga ginlagas ang mga biktima. Wala pa mahibaluan kun ano nga pusil ang gingamit sa krimen.
Na-recover sa crime scene ang tatlo ka basiyo sang wala pa mahibaluan nga pusil. Padayon pa nga gina-identify ang mga suspek.
‘NAGPANGSABAD SA KASAHAN’
Nag-roving kagab-i si Tanza Timawa zone 2 Kagawad Ledia Milgar antes natabo ang insidente.
Suno sa iya, yara sila sang iya mga tanod sa Brgy. Infante sang may nabatian sila nga tatlo ka lupok.
Ginpahayag niya nga luyag kuntani kadtuan sang ila mga tanod ang ginhalinan sang lupok pero ginpunggan niya bangud delikado.
Sa pagpangusisa ni kagawad Milgar, nagapangsabad ang apat ka mga lalaki sa kasahan sa Tanza Esperanza sang nalabayan sang duha ka mga lalaki nga naga-angkasanay sa motorsiklo kag ginsaway.
Naakig ang apat ka mga lalaki sang ginsaway sila rason nga ginbuno sang isa nila ka upod ang nakamotorsiklo kag ginlagas pa gid sang tatlo ka upod sang nagpalagyo.
Nabatian sang mga tawo suno kay Kagawad Milgar nga nagasinggit ang apat ka mga lalaki nga “wala pulos mga pulis.”
Dugang ni Milgar, ginhulat sa unahan sang mga nakamotorsiklo ang mga lalaki kag gintiro.
