Protocols para sa returning residents sa Iloilo province, i-adjust ni Gov. Defensor Jr; Negative RT-PCR test result, mangin requirement
ILOILO (UPDATE) – Kinahanglan sang returning residents nga magpresentar sang negatibo nga RT-PCR test result nga indi maglapaw sa 72-oras sang gin-issue antes ang pagpauli sa mga lugar sa Western Visayas.
Ginkasugtan sa sinapol sang mga local chief executives sa Rehiyon 6, suno kay Iloilo Governor Arthur Defensor Jr., nga alalangay na lang nga protocols ang ipatuman.
Suno sa gobernador “ma-obligar kita nga mag-adjust sang aton nga Executive Order. Sa aton Executive Order [No. 183-L], waay pa kita ga-require [sang negative RT-PCR test] sa aton mga returning residents.
Maayo gid ina nga uniform ang aton nga protocols for Region 6.
“Ang isa gid ka rason sina, in the past 48 hours since we issued our executive order, naglain ang sitwasyon sa Metro Manila,” suno sa gobernador rason nga kinahanglan sang adjustments.
Sa pagkamatuod suno sa iya nga isa sa mga direksyon sang mga LCEs sa Rehiyon 6 “gina-anticipate namon ang possible nga moratorium sa pagsulod sang tawo diri sa probinsiya, especially halin sa Manila kay te nagalain ang sitwasyon.”
Masapol pa liwat ang mga LCEs sa Biyernes, Marso 19, kag tan-awon pa kun ano ang matabo sa Metro Manila bangud sa pagtaas sang kaso sang COVID-19. Mapaguwa sang bag-o nga EO ang gobernador sa masunod nga inadlaw.
“Mahatag anay kita sang gamay nga adjustment period sa mga kasimanwa ta para ang didto sa Manila maka-adjust man para resonable siya. We will give a little leeway for the adjustment,” dugang sang gobernador.
‘ANO ANG MATABO KUN NA-CANCEL ANG FLIGHT KAG NAG-EXPIRE ANG RT PCR TEST RESULT?’
Suno kay Defensor, “ang matabo sina nga kun mag-expire na siya ang maayo gid sina para sa aton, para sa safety man naton tanan nga MAKUHA GID KITA SANG BAG-O NGA TEST [result] kay te, waay na to ang pag-andam nga ginapangita naton.
Importante sa aton nga halos tanan nga nagasulod diri sa Region 6, pare-parehos sila nga may [negative] RT PCR [test result].
Te, kun maglampas na ang tiyempo, waay na to ang aton nga pagsalig.
Kinahanglan nga i-require ta gid na nga indi gid maglayo ang antad, kay kun layo ang antad, daw pareho lang na nga wala ka sang RT PCR.
“Te, para man na sa ila nga safety kag sa safety man gid ya sang bilog nga Region 6 kag sang probinsiya sang Iloilo.”
Ginpahayag pa sang gobernador nga nakahibalo siya nga dugang ini nga gasto sa mga returning residents pero kinahanglan nga mag-andam batok sa COVID-19.
Ginahimo ini suno sa iya agud indi pagpabudlayan ang mga returning residents kundi para masiguro ang safety nila kag lugar nga ila kadtuan. –via PM Reports
