By: Aine Grace Bravo | March 17, 2021

ILOILO – Daku na ang progreso sa pagpakig-away sang Pilipinas batuk sa COVID-19.

Ini ang pahayag ni Iloilo Governor Arthur Defensor Jr., isa ka tuig matapos nga nagpatuman sang community quarantine sa pungsod bangud sa pandemya.

Gin-ako sang gobernador nga indi pa gid lubos nga kilala ang COVID-19 sa nakaligad nga isa ka tuig kag ginatan-aw nga solusyon diri ang bakuna.

Makabig suno sa iya nga improvement sa pagpakig-away sa pandemya ang pag-implementar sang national vaccination plan kag kun tan-awon ang pangkabilogan nga plano, yara ang pungsod sa husto nga “track.”

Sa probinsiya sang Iloilo, napatuman man ang vaccination plan kag naumpisahan na nga nabakunahan ang mga medical frontliners.

Sa subong, suno sa gobernador, plastado kag preparado na ang sistema kag protocols pananglitan magsaka ang kaso sang COVID-19 bangud maga-execute na lang ang probinsiya.

Dapat lang suno sa iya nga indi mag-panic bangud may sistema naman kag sundon na lang ang procotols kag quarantine procedures.

Ginpanugyan man niya nga dapat ikabuhi ang pag-andam batok sa COVID-19 paagi sa pagsunod sa minimum health protocols. – via Firingline