(Update) Kaso nga murder, ipasaka batuk sa 3 suspek sa pagpatay sa jailwarden sa Sta. Barbara
By: Aine Grace Bravo | March 18, 2021
STA. BARBARA, Iloilo – Ginapreparar na sang Sta. Barbara police ang mga dokumento nga kinahanglan agud mapasakaan sang kaso ang tatlo ka suspek sa pagtiro nga nagresulta sa pagkapatay ni Jail Senior Inspector Andrew Larupay sa Bangga Dama, Sta. Barbara pasado las-11 kaina sang aga.
Suno kay PMAJ Raymond Celoso, hepe sang Sta. Barbara MPS, kaso nga murder ang ipasaka batuk kanday PFC Bjourn Kirby Esposo, Staff Sergeant Nelson Sorolla, Jr. kag Nilo Silao.
Sanday Esposo kag Sorolla ang miembro sang Philippine Army nga na-assign sa 12th IB sa Brgy. Libot, Calinog, samtang CAFGU member si Silao. Yara na sa custody sang Sta. Barbara police ang tatlo.
INITIAL INVESTIGATION
Sa pagpangusisa sang Sta. Barbara police, ginsaysay ni Esposo nga nagsugod sa Cabatuan ang tanan sang nagpamusina ang awto nga ginamaneho ni Larupay agud mag-overtake. Sang nag-overtake, nagpamusina man si Esposo nga nagamaneho sang elf truck.
Pag-abot sa Bangga Dama, ginparahan ni Larupay ang elf truck gani nga nagdulog sa unahan sang awto.
Sa alegasyon sang mga suspek, may komprontohanay nga natabu kag gin-alegar nga ginhampak sang biktima si Esposo kag gintayaan man sila sang pusil. Nahulog, suno kay Esposo, ang pusil ni Larupay kag ginhambalan niya nga indi na pagpuluton, pero ginpulot ini sang biktima gani nga iya gintiro.
May pito ka igo si Larupay, suno kay Major Celoso.
PANAYSAYON SANG MGA TESTIGO
May lain-lain naman nga version ang duha ka testigo nga na-interview sang Aksyon Radyo Iloilo.
Suno kanday alyas Bong kag alyas Toto, nakita nila nga si Esposo ang nagtiro kay Larupay. Pero wala nagasantu ang ila pahayag sa pagkomprontahanay nanday Esposo kag Larupay.
Naabtan ni Toto nga bukas ang pwertahan sa driver side sang awto samtang ara sa sulod sang elf truck ang kamot sang biktima. Ginpahayag ni Toto nga nakita niya nga nagbalik sa iya awto si Larupay kag nagkuha sang pusil. Nakita niya man nga nagpanaug ang driver sang elf truck, nagsunod sa biktima kag gintiro ini pero wala naigo bangud nagaduko pa.
Nabatian man ni Toto ang sunod-sunod pa nga lupok kag sang nagtungkaaw si Larupay, naigo siya kag natumba. Wala na namulalungan ni Toto kun nakabalos palupok si Larupay.
Nagtabok sa pihak nga karsada ang driver kag isa pa ka upod niya, samtang nakita ni Toto nga nakabangon pa si Larupay kag nagkadto sa elf truck antes natumba sa driver side.
Sa panaysayon naman ni alyas Bong, nakita niya nga nagabusinahay ang awto kag elf truck, tubtob ginbalabagan sang awto ang elf truck.
Nagplastar ang elf truck sa unahan sang awto, kag nakita ni Bong nga nagpanaug ang driver nga si Larupay, ginpalapitan ang elf truck, ginsita, ginbuyayaw, gintampa kag ginsumbag ang driver nga si Esposo. Nabatian ni Bong nga nagapangayo sang pasensya si Esposo, pero ginkuha ni Larupay ang iya driver’s license.
May dala na suno kay Bong nga pusil si Larupay sang nagpalapit sa elf truck.
Sang hana nga sumbagon liwat ni Larupay si Esposo, gintiro siya sang makaduha ka beses, pero wala pa natumba ang jailwarden. Naghana man sa paggabot sang pusil si Larupay gani nagpanaug si Esposo kag nagdalagan sa unahan sang elf truck kag liwat nga gintiro ang biktima nga naigo sa hitsura kag natumba. –via Aksyon Kikik Enar