Iloilo province, wala napaidalom sa ECQ
ILOILO – Gin-athag sang Iloilo provincial government paagi sa ila official Facebook page nga Balita Halin sa Kapitolyo nga WALA napaidalom sa Enhanced Community Quarantine (ECQ) ang probinsya sang Iloilo.
Base sa post sang Balita Halin sa Kapitolyo “There is no truth to reports that Gov. Toto Defensor has placed the Province of Iloilo on ECQ. He simply wants us to be on ‘ECQ mode.”
Sa press conference ni Governor Defensor kahapon, Marso 19, ginpahayag niya “para nga mabalik naton ang pag-andam. Ginabalik naton sa consciousness sang tawo nga subong dapat daw ECQ mode kita sa pag-andam. Ibalik naton sa pinsar sang tawo nga ara pa ang problema sa aton so that is why we are doing this right now.”
Suno sa iya, nagapanghanda ang probinsya sa posible nga pagdamo liwat sang COVID-19 cases nga kapareho sang surge sa National Capital Region.
Malayo pa man suno sa gobernador ang sitwasyon sang probinsya sa nagakatabu sa NCR, pero mas maayo nga nakapreparar.
Nagpasa sang resolution ang gobernador nga nagahingyo sa mga partner agencies nga istrikto nga ipatuman ang mga health protocols nga nabutang sa iya ginpagguwa nga mga memorandum.
Ginpahanumdom sang gobernador ang tatlo ka M nga mag-maskara, mag-distansya kag manghinaw agud makalikaw sa COVID-19. –via Balita Halin sa Kapitolyo