Wala sang lockdown sa Iloilo City — City COVID-19 team spokesperson Jeck Conlu
ILOILO CITY – “Wala kita ya sang lockdown [sa Iloilo City] kag indi kita under sa ECQ status, ang aton nga siyudad.”
Ginhimo ni Iloilo City COVID-19 team spokesperson Jeck Conlu ang paathag kasunod sang pagpabutyag sang publiko sang ila kahangawa nga i-lockdown ang siyudad bangud sa pagdamo sang kaso sang COVID-19.
Subong nga Marso 2021, napaidalom sa Modified General Community Quarantine (MGCQ) ang siyudad.
Ginpahibalo man ni Conlu nga sugod subong nga adlaw, Marso 20, gina-require na ang mga returning residents sa Region 6 lakip sa Iloilo City ang negatibo nga RT-PCR test result nga indi maglapaw sa 72-oras sang gin-issue antes ang pagbyahe.
Una nga ginkasugtan sang mga local chief executives sa Western Visayas nga himuon alalangay ang protocols sa mga mapauli nga residente.
Gin-athag man ni Conlu nga indi na kinahanglan sang returning residents nga mag-quarantine pag-abot sa siyudad magluwas lang kun wala sang sintomas pag-abot sa airport ukon sea port.
Kun may sintomas, posible nga irekomendar nga ipaidalom siya sa RT-PCR test ukon mag-quarantine.
Nakadepende sa residente kun mag-home quarantine, hotel quarantine ukon facility quarantine siya.
“STATUS SANG QUARANTINE FACILITIES SA SIYUDAD”
Puno na ang mga quarantine facilities sa Iloilo City kasunod sang pagtimbuok sang kaso bangud sa mga call center agents sang Hinduja Global Solutions – Strata site sa Bolilao, Mandurriao nga nagpositibo sa COVID-19.
Ginatinguhaan sang siyudad suno kay Conlu nga makadugang bukas sang dugang nga pasilidad agud kun may magdugang sa kaso, may butangan sa ila. – via Aksyon Hotline
